اليوم كنت حابب أمشي .. حالة مابعد المطر بتغريني كتير.. كيف إذا كانت
الساعة 8 باليل؟؟ ... حاولت استعين بصديق ... فقسني ....مشيت لحالي
الظاهر كنت بحاجة اني أمشي لحالي ..
الظاهر كنت بحاجة اني أمشي لحالي ..
قررت غني بصوت عالي بغض النظر عن الناس ... غنيت مع انو صوتي غليظ مريت من حد المدينة الجامعية "محل مابيقعدوا العشاق" كان "العبط " شغال كملت غني وتقصدت علي صوتي حدن .. الكل صار يضحك .. عجبتني هالحالة "اني عم ضحك حدا" ... والي عجبني أكثر حالة العشق يلي عم يعيشوها ...
.
قعدت عالرصيف طلع معي فكرة: سبب الأزمة يلي عم نمر فيها انو نحنا بعّدنا عن الأرض بالمعنى المادي للكلمة .. نحنا بحاجة انو نلعب بالتراب وبالحجار أكتر متل أيام طفولتنا .. نحنا بحاجة انو يكون في نهر ولو صغير أو ساقية نزت حالنا فيها ونغوص بأعماقها .. نحنا بحاجة شوية ضياع بالبرية بلكي منلاقي أنفسنا.. نحنا بحاجة لنتسطح على هالأرض ونصفن بالسما ونراقب .. كل هالأشيا كنا نعملها ونحنا أطفال .. لهيك كان إنتمائنا لهالأرض أكبر وأعمق وأرسخ ... كملت باتجاه الشيخ سعد "نتفت" سندويشة فلافل ساطحتني حالياً بالفرشة . #وسيم_سليمان
.
ليست هناك تعليقات:
إرسال تعليق